زمان الجميل.... والا انا فاكر كده؟
وأنا بشرب القهوه النهارده الصبح، فتحت التليفزيون علي قناة الحياه، لقيت أغنية لفريد الأطرش عن "بساط الريح"، وزيارته لبلاد الشام (سوريا ولبنان) والعراق وتونس ومراكش وعودته لمصر، في أوبريت جميل بتكنولوجيا أيام زمان ... بيتكلم عن جمال البلاد دي وجمال شعوبها وبسالتهم وإتحادهم .... إلخ
لم أتماك دموعي .... بكيت. لأكتر من سبب بكيت.
بكيت لما جاب بساط الريح في العراق .... يا بلاد الخيرات والأمجاد .... هيا فين العراق دي دلوقتي؟ والا فين الخيرات دي؟ لا والا أحدث خبر إلي بيقول إن محاميين صدام حسين إعترفوا إن إلي كان بيتحاكم وإلي مثل دور الإعدام كان شبيه لصدام حسين، وإن رغد بنته هي مخرج كل السيناريو دا، وإن صدام بعد ما باع العراق عايش في حماية الأمريكان..... أهو كلام مش مؤكد ومش منفي.
سوريا ولبنان ماسكين في خناق بعض وإشي شغل مخابرات وإشي شغل تفجيرات وشويه جيش سوري داخل هناك وشويه ينسحبوا .... وضاعت بلاد الشام وجمال بلاد الشام وجبال بلاد الشام .... ووقعت سوريا مخنوقه من كل النواحي وترمي نفسها مره لإيران ومره لروسيا ... وبلاد الشام بقت ولا حمص الشام.
بكيت علي الزمن القديم .... 35 سنه زمان حسب ما عشته .... أيام تان تان وميكي وسمير .... أيام اللحمه بـ 2 جنيه .... أيام ما كان الخضار ليه طعم .... أيام الدنيا ما كانت سهله والشوارع فاضيه.
رمضان كان ليه طعم تاني ... الشوارع في رمضان كان ليها شكل تاني.
العيد كان فرحه بجد .... والا لبس العيد كان حكايه جميله ... دلوقتي ولادي معندهمش الفرحه دي ولا الإحساس دا.
مكانش في مسلم ومسيحي .... عمري في حياتي مسمعت كلمة مسلم ومسيحي ..... كان في قسيس ساكن تحتينا .... كان كل الإحترام لأبونا من العماره كلها.
أيام الفن الجميل .... عبد الوهاب وأم كلثوم وعبد الحليم وفريد الأطرش وورده وفايزه أحمد .... محمود المليجي عماد حمدي شكوكو شاديه رشدي أباظه فاتن حمامه ..... حتي أيام علي الحجار ومحمد منير ..... مش محتاج أقارن مع جيل تموره وأخلاق تموره.
والا الأخلاق .... كان في خشا وحيا وعيب.
أيام الشلن والبريزه الورق .... كنت بحبهم أوي :) ..... شلن وبريزه بتوع زمان مش بتوع دلوقتي. والله كانوا بيشتروا حاجات كتير.
أيام مكانش في البيلدرز جروب في مصر.
كل دا جه في دماغي في عشر دقايق.... يخليني أبكي طبعا..... والا أنا مخدوع؟
إفتكرت أيام مسلسل الملك فاروق .... نفس حالة البكاء في أخر حلقه .... بقي إنتم شلتوا دول علشان تجيبوا دول؟؟؟؟ يا ولاد الـ ....
إتخطفنا بدري.
والا انا فاكر كدة؟
ما علينا ... كل سنه وإنتم طيبين.
0 التعليقات:
إرسال تعليق