رفاقى الوحدة و المنفى

فلسطيني

رفاقى الوحدة و المنفى و شوق الريح

مهاجر من وطن ضايع لقلب جريح

بتهزمنى انكساراتى و برفع اعلى راياتى

حياتى فى زمن آتى يا أرض النور تحاوطينى

فلسطينى .... فلسطينى

بيسرى الاقصى فى دمى اسير و عنيد

و بلدى , و وجهتى , و يومى فى هواها شهيد

سلاحى قبضة معتلة و حتى النبضة محتلة

لكن روحى ما تتخلى عن الجرح اللى يبقينى

فلسطينى .... فلسطينى

انا شاعر لكن قدرى اغنى بارود

يا عشاق البراح امتى تكون لى حدود

و امتى الفجر يا أمة و أحس براحة الضمة

يا أستشهد , يا أتسمّى فى ليلة بدرحطينى

فلسطينى فلسطينى

فلسطينى فلسطينى

سيد حجاب

يا مـصـري

يا مصري ليه دنياك لخابيط و الغلب محيط

والعنكبوت عشش ع الحيط وسرح ع الغيط

يا مصري قوم هش الوطاويط ... كفاياك تبليط

صعبة الحياة والحل بسيط ... حبة تخطيط

فتحت باب استيرادك

وصرفت فوق ضعف إيرادك

حِلي للخواجة استكرادك

سابك بتقرا في أورادك

وده قشّطك ونزل تشفيط

يا مصري ليه دنياك لخابيط والغلب محيط

والعنكبوت عشش ع الحيط وسرح ع الغيط

ومهولاتي تحب تزيط

ساعة الفرح زغاريد تنطيط

وفي المياتم هات يا صويت

وفي المظاهرات سخن تشيط

و في الانتخاب تنسى التصويت

يا مصري ليه دنياك لخابيط والغلب محيط

والعنكبوت عشش ع الحيط وسرح ع الغيط

وليه بترشي وتتساهل

وتضيع حقوقك بالساهل

تستاهل النار تستاهل

يا غويط ويحسبك الجاهل

سهل وساهي وغبي وعبيط

يا مصري ليه دنياك لخابيط و الغلب محيط

و العنكبوت عشش ع الحيط و سرح ع الغيط

يا مصري يا للي الغلا عاصرك

والنهب في عصرك حاصدك

قوم للحياة واسبق عصرك

ولا حاجة هترجع مصرك

إلا ان تكون شغال ونشيط

يا مصري ليه دنياك لخابيط والغلب محيط

والعنكبوت عشش ع الحيط وسرح ع الغيط

يا مصري قوم هش الوطاويط ... كفياك تبليط

صعبة الحياة والحل بسيط ... حبة تخطيط

طبعا سيد حجاب قصده يقول يا أندونيسي

بس ماخدش باله وكتب يا مصري





ali rizk

مصري قوم هش الوطاويط ... كفياك تبليط

صعبة الحياة والحل بسيط ... حبة تخطيط


قال يعنى هى نقصه عكننه

بس جامدين

ابو تميـــــم

لاشك إن بخيت وحجاب اتنين

من ابرع شعراء العامية وكلماتهم بسيطة

وعميقة ومؤثرة جدا

لامسين الواقع المحيط بيهم وبيعبوا عنه

فى سلاسة وببساطة

لاشك إن ( فلسطيني ) تحفة

ومش عارف هل سمعتها بصوت على الحجار ؟

قمة



شكرا ياألفي على العكننة البليغة




alfyaat

فعلاً يا بو تميم فلسطيني فيها بيت شعر مالوش حل

سلاحى قبضة معتلة و حتى النبضة محتلة

وعلي الحجار غنى يا مصري كمان

بس طبعا ما اعتقدش ان فيه حد ممكن يغني الفتره الجايه لسهارتو إلا إذا كان مطرب صايع ومقطع البطاقه وهدومه كمان