الخميس، 3 ديسمبر 2009

اللى ما حضرش حفلة لعلى الحجار يحضر بأى شكل وفى أى حتة





أنا واحد من الناس اللى أسعدهم الحظ


بلقاء الإنسان على الحجار


حضرت حفلته فى ساقية الصاوى شهر 10\2008


الحفلة اتأجل معادها من 8 مساء لتبدأ 10مساء


حتسألوا ليه


وركزوا قوى فى اللى جاى دا


لأن على الحجار كان عنده حفلة فى الأوبرا فى نفس اليوم


خلصت وجه منها على الساقية على طول عشان يبدا الحفلة


بدأ الحفلة بإنه سلم عالكل


واعتذر عن اضطراره للتأخير لأن الأوبرا

ماكانش عندهم التنسيق لكافى إنهم يقولوله

على معاد حفلته المتفق عليها خلال شهر 10

غير بعد ما اتفق مع الساقية


على معاد حفلتهم


واحتراما للأوبرا وللساقية ولكل الناس اللى

بتحبه وراحت له المكانين


عمل حفلتين ورا بعض مدة كل واحدة ساعتين


بفاصل راحة نص ساعة فقط


ودى حاجة ماحصلتش


دا الإثبات الحى اللى انا شفته وسمعته وحضرته بنفسى


على أصالة هذا الفنان من جهة


وقوة صوته من جهة أخرى


ربنا يحفظه ويخليه لينا وما يحرمناش منه أبدا


الحفلة بعد كدة بدأت بنكتة منه انه جاى تعبان

ومتبهدل وما لحقش حتى يغير الهدوم اللى عليه

مع إنه كان لبسه حلو والله

وبدأت الحفلة ب أغنيته الرائعة عارفة

وصحى فى أيام برنامج الشباب أمانى وأغانى

وحدفنى لورا 11 سنة مرة واحدة


وافتكرت التسعينات بكل موضاتها وأحداثها


وانتظارى للكليبات الجميلة بتاعة مدحت صالح

ومحمد الحلو وفؤاد وحميد وهشام التشكيلة الروعة

دى كانت فى التليفيزيون المصرى الجميل فى هذا الوقت



خلصت الأغنية فحيا الفرقة ومهندس الصوت

وقال إحنا حنيجى هنا على طول

ومن يومها وهو له حفلة كل آخر يوم

أربعاء فى الشهر الميلادى فى الساقية

بتذكرة سعرها رمزى

عشان بس مش كل البشر اللى بيحبوه يروحوا

وإلا حتبقى مظاهرة ومش بعيد يبعتوا

الأمن المركزى يضرب التجمعات

المهم

تدرج فى الأغانى

زى الهوى_لو تعرفى_

أغنية مسلسل بوابة الحلوانى اللى قال

عنها إنها آخر أعمال العظيم بليغ حمدى

_يالعروسة (ودى فى الشريط الأخير وماكانتش نزلت لسة

سمرة وبعيون كحيلة

(الأغنية دى أنا متأكد انها بتمثل

ذكرى جميلة لكل اللى سمعها

وغنوة مكتوبالى

وغنوة عم بطاطا اللى قال فيها بذكاء فنان

(ستين سنة بدل الكلمة الأصلية خمسين

عشان يواكب الواقع بمرور 10 سنوات

على كتابة الغنوة وستين سنة على

زرع الكيان الصهيونى فى فلسطين_

وغنوة يا مصرى ليه دنياك لخابيط

اللى كلها فى حال البلد

عشان تحس ان دلوقت زى زمان

بالظبط والحال ما بيتغيرش

يا مصرى ليه دنياك لخابيط و الغلب محيط


والعنكبوت عشش عالحيط وسرح عالغيط


يا مصرى قوم هش الوطاويط كفاياك تبليط


صعبة الحياة والحل بسيط حبة تخطيط

والغنوة دى فى شريط تجيش نعيش إصدار1995

إيه رأيكم بقى؟؟

مش حانسى صاحبى اللى قعد فى

كل فاصل يقوله (جفنهو يا على جفنهووو

وهو يرد عليه بكل زوق

ويقوله حاضر والله حاغنيها حاضر

وبعدين يغنيها بكل ما فيها من قوة وجمال وحب ودوبان

فيلهب إيدينا بالتسقيف

لحد ما يشاور لنا عشان يغنى الغنوة اللى بعدها


إحنا كنا غايبين معاه فى حالة فى منتهى الروعة

لازم اللى ماحضرش حفلة لعلى الحجار

يحضر بأى شكل وفى أى حتة


وفى وسط الحفلة سيدة فى حدود الخمسينات

من العمر تنده له فيسكت الناس ويقرب من

حافة المسرح ويوطى دماغه عشان يسمعها

فتقوله عايزين القديم كله إحنا معظمنا كبار

(الظاهر الست دى ماشافتش انها فى

الصف التانى وكل اللى وراها شبااااااب لآخر القاعة


فيرد هو عليها بإنه يشاور على أصغر

طفل فى القاعة ويقولها داأكبر واحد فينا

وكل اللى عايز حاجة حاغنيهاله

وغنى أغنية والده الجميلة _عزيز على القلب_

وهو مستشعر حضوره معاه لدرجة

إنى شفت دموعه من مكانى بتلمع فى عينيه

وهو بيغنى لعالم الأرواح وبيقول


عزيز على القلب تمنيه

وتوعده بقرب وصالك

وبعدها ترجع تجافيه

يحتار فى قربك ودلالك

ياقلبى صدقت وعوده

وفضلت عايش فى الأوهام

تستنى هيمان مواعيده

لوطيفه زارك فى الأحلام


الغنوة دى موجودة فى شريط الأحلام

وهى من روائع والده وروائعه


وبعد كل الجمال دا

غنى -صلينا الفجر فين-

عشان يختم بصوفية التكبير كل الحفلة

ويأكد إننا كنا فى لقاء أرواح

ويسيبنا نطير بجناحات صوته

جوانا فى طريق الخروج للشارع



وانتظرته طبعا أنا وأصحابى برة


أول ما شفته سلم على فى بساطة وتواضع شديدين


قلناله كلنا بنحبك وكلنا مصدقينك

قالنا وانا باحبكم كلكم

قلت له أنا باسمعك تقريبا كل يوم

قال لى طب غير ياأخى عشان ماتزهقش

وحضنته وسلمت عليه وانا حاسس

انى باضم بين دراعاتى مصر كلها

أنا عمرى ما حانسى الحفلة دى

ولا اللحظة دى

وطبعا مانسيتش اتصور معاه

يا ريت كمان كل الناس اللى قرت الموضوع دا

يسمعوا أغنية باحبك بتاعته وشوفوا على بيحب إزاى

ودا رابط التحميل

http://www.mawaly.com/file/download/25642.html

ولكم جميعا خالص تحياتى

وطبعا طبعا باحبك يا على

واتمنى لك كل خير

إنت ماتعرفش أسعدتنى قد إيه بحالة الشريط الجديد

إنت بتغنى كلام فعلا ماحدش يقدر يغنيه غيرك

سلام


Mohamed Mostafa Swahly

0 التعليقات:

إرسال تعليق

قائمة المدونات الإلكترونية

  • كورونا الاهلي والزمالك - باقي علي القمة الافريقية بين الاهلي والزمالك اقل من ٢٥ ساعة وناتي للاثارة والمتعة وجمال الكرة سواء من الاهلي او الزمالك ما يشغلنا في هذه المبارة موضو...
    قبل 3 أعوام
  • اعتقال أمريكي بسبب طعنه للبطيخ بطريقة عدوانية - * يواجه أمريكي تهمة التهديد من الدرجة الثانية بعدما اشتكت عليه زوجته للشرطة إثر تعرضها للإرهاب النفسي حين رأته يطعن بطيخة بطريقة "عدوانية" أمامها و...
    قبل 9 أعوام
  • La lingua Italiana per stranieri - Katerinov - La lingua Italiana per stranieri - Katerinov Book: Download here ( djvu format ) Audio: Download here
    قبل 10 أعوام
  • مسرحية " ذكى غبى جدا " - *مسرحية " ذكى غبى جدا *" *بطوله : * *على الحجار* * و محمد سعد* * و ميمى جمال* *تحميل مجاني - Free Download* *Server* مشاهدة مباشرة اون لاين *ana...
    قبل 11 عامًا
  • Pavarotti - Nessun Dorma (Live in Paris) - *ITALIAN;* *Nessun dorma! Nessun dorma!* *Tu pure, o, Principessa,* *nella tua fredda stanza,* *guardi le stelle* *che tremano d'amore* *e di speranza.* *M...
    قبل 11 عامًا
  • برلمان التحرير - «حصاوى بالمقهى يجلس شاردا وبجواره جاره» الجار: سرحان فى إيه يا حصاوى؟ حصاوى: أصلى بفكر أرشح نفسى للبرلمان. الجار: هاهاى، دا أنت مغمى عليك يا حصاوى، انتخ...
    قبل 11 عامًا
  • يا بارى الكون - يا بارى الكون فى عز وتمكين وكل شى جرى بالكاف والنون يا من احس به فى كل كائنة وقد تعاليت عن ظن وتخمين فى هدئه الليل يارب اراك فى هدئة الليل يارب اراك ف...
    قبل 12 عامًا
  • - معكم يوميا راديو الحجار من الساعه التاسعه الي الساعه العاشره صباحا ومن الساعه الثانيه ظهرا الي الرابعه ظهرا ومن الساعه الواحده بعد منتصف الليل الي السا...
    قبل 13 عامًا
  • اطفال الجنه - ايها الحب المطل من شرايين النقاء ايها الخير العظيم يا ضياء من ضايء ايها الحب المطل من شرايين النقاء ايها الخير العظيم يا ضياء من ضايء جئت بالحق تنادى ر...
    قبل 14 عامًا

إجمالي مرات مشاهدة الصفحة