يا مصري
يا مصري ليه دنياك لخابيط
و الغلب محيط
والعنكبوت عشش ع الحيط
وسرح ع الغيط
يا مصري قوم هش الوطاويط ...
كفاياك تبليط
صعبة الحياة والحل بسيط ...
حبة تخطيط
................................
فتحت باب استيرادك
وصرفت فوق ضعف إيرادك
حِلي للخواجة استكرادك
سابك بتقرا في أورادك
وده قشّطك ونزل تشفيط
يا مصري ليه دنياك لخابيط
والغلب محيط
والعنكبوت عشش ع الحيط
وسرح ع الغيط
................................
ومهولاتي تحب تزيط
ساعة الفرح زغاريد تنطيط
وفي المياتم هات يا صويت
وفي المظاهرات سخن تشيط
و في الانتخاب تنسى التصويت
يا مصري ليه دنياك لخابيط
والغلب محيط
والعنكبوت عشش ع الحيط
وسرح ع الغيط
................................
وليه بترشي وتتساهل
وتضيع حقوقك بالساهل
تستاهل النار تستاهل
يا غويط ويحسبك الجاهل
سهل وساهي وغبي وعبيط
يا مصري ليه دنياك لخابيط
و الغلب محيط
و العنكبوت عشش ع الحيط
و سرح ع الغيط
..............................................
يا مصري يا للي الغلا عاصرك
والنهب في عصرك حاصدك
قوم للحياة واسبق عصرك
ولا حاجة هترجع مصرك
إلا ان تكون شغال ونشيط
يا مصري ليه دنياك لخابيط
والغلب محيط
والعنكبوت عشش ع الحيط
وسرح ع الغيط
يا مصري قوم هش الوطاويط ...
كفياك تبليط
صعبة الحياة والحل بسيط ...
حبة تخطيط
شعر سيد حجاب
غناء علي الحجار
بجد يا محمد
انا اول مرة اسمعها
فى الاول قرات الشعر فشدنى جدااا
بجد جميل
وكان مفاجئة انها بصوت الحجار
وبنزل الفيديو حاليا وانا بكتب الكومينت
تسلم اختياراتك
بس خاف على نفسك :))
ربنا يوفقك فى امتحاناتك ونتيجتك
وبعتذر عن بعد المتابعة
عارف الامتحانات خلاص بدات
ما بقى الا ثلاثة اشهر ونصف حتى انتهى :))
ان شاء الله خير
اهلا رنا منوره المدونه:)
اكثر جزء منطبق ميه في الميه
ومهولاتي تحب تزيط
ساعة الفرح زغاريد تنطيط
وفي المياتم هات يا صويت
وفي المظاهرات سخن تشيط
و في الانتخاب تنسى التصويت
يابنتي معلش كله الفتره دي مش بيتابع التدوين وانا اولهم
معلش شويه وهنرجع:)
المهم شدي حيلك انتي بس السنه مش خفيفه
وطمنينا
تسلم محمد
إن شاء الله تسمعوا أخبار الامتحانات فى متابعات ساخنة عالمدونة :)))
الاهم انى بستأذنك بعد ما تخطى التوبيك ما يقرب من اسبوع على مدونتى
:)
أستأذنك لأنى أخذت التوبيك كتدوينة على مدونتى
حلوة اوى .. كنت سمعتها زمان و بعدين نسيتها ..
رنا:
:) معلش مدخلتش المدونه دي من زمان
وبعد ردك بشهرين بقولك المدونه بتاعتك شيلي اللي يعجبك
كراميلا:
فعلا جميله
نورتين