‏إظهار الرسائل ذات التسميات قبسات. إظهار كافة الرسائل
‏إظهار الرسائل ذات التسميات قبسات. إظهار كافة الرسائل

السبت، 16 فبراير 2013

تفاصيل اغنيه في قلب الليل

 

يروي الفنان المصري علي الحجار تفاصيل القصة الحقيقية

 التي عاشها صديقه

واستلهمت منها كلمات أغنية "في قلب الليل ".

 


 

الخميس، 17 يونيو 2010

علي الحجار والاستبن





كان صباحا شتويا كئيبا مشرقا!ولذا كان لابد وأن تكون العجلة اليسرى الأمامية نائمة في سابع نومه ... "عادي مش أنا اللي اتشاءم من الحاجات دي ع الصبح" ، وكأي مواطن صالح أفتح الشنطة حتى أحضر العجلة الأستبن.. طيب هي فين العجلة؟!.. كل من يرى أي عربية 128 سائرة في شوارع المحروسة -وما أكثرها- يدرك أن شنطتها صغيرة جدا مش كهف بلا نهاية يعني.. طيب راحت فين العجلة.. يمين شمال.. أقلب كل ما في الشنطة رأسا على عقب ولا فائدة لأكتشف الحقيقة المرة .."أنا اتسرقت"!

***

وعامل محطة البنزين يرتق الثقب الموجود في العجلة التي كانت نائمة أقول له محاولا أن أداري فضيحة إني "اتجلبت": ماتعرفش العجلة الجديدة بكام أصلي شاري العربية جديد ومافيهاش استبن!
رد بكل هدوء وهو يواصل عمله: قصدك الاستبن بتاعها اتسرق! عادي.. اصل الـ128 كده دايما سهل أي واحد يفتح شنطتها... أه بتسأل على العجلة الجديدة..لا والله ما أعرفش!

***

وأنا في طريقي للعمل كنت أشعر بضيق فعلا ليس لأن العجلة اتسرقت ولكن لدلالة ما حدث.. وهو أني غير آمن.. وأني لا أملك أي ضمان بعدم تكرار هذا الأمر أو تطوره لما هو أكبر "يعني المرة الجاية ممكن يسرقوا العربية ويسيبوا لي الاستبن!"..عمار يامصر بصراحة..فالح بس حبيب العادلي يمسك في بتوع الإخوان ويسيب الناس تتسرق وهي نايمة في بيوتها.. أفكر في تغيير إيقاع هذا اليوم الكئيب... نلعب كورة.. كويس.. نتفق مع الشباب.. وأهي الكورة جاهزة دايما في شنطة العربية.. كورة! ..شنطة!.. يانهار أبيض.. ده الحرامي سرق الكورة مع الاستبن!

***

كنت أسمع "علي الحجار" وهو يغني "يمامة" في شريطه الأخير الذي لاعلاقة له بـ"علي الحجار" الأصلي لكنه على كل الأحوال أعاده إلى الحياة من جديد، عندما اقتربت بسيارتي من كمين شرطة عزيز يقع في منتصف الطريق الدائري الواصل بين مصر الجديدة وشبرا.. هدأت السرعة كما فعل كل من كانوا بالجوار ثم تجاوزنا الكمين وعندما بدأت في زيادة السرعة من جديد توقفت السيارة التي في أمامي فجأة بعدما قطعت الطريق من أمامها سيارة ثالثة بلا أي سبب منطقي.. أضغط على الفرامل بقوة فتستجيب السيارة العزيزة كأي سيارة بنت حلال وتقف قبل الاصطدام بالأخ الذي أمامي بسنتيمترات ..فات جزء من الثانية شعرت فيه بالراحة قبل أن يأتي الفزع من الخلف .. "كراش"!.. إذا كانت السيارة التي بخلفي هي ميكروباص تويوتا ياباني أصلي جديدة فالأكيد أن فراملها حديد.. وهو مايعني أن الواد الـ"........" اللي سايقها ده هو اللي ولامؤاخذة بقى! .. يصمت "على الحجار" بعد أن خرج الكاسيت من مكانه من شدة الخبطة.. وأفتح أنا الباب في عنف والنار التي بداخلي كفيلة بحرق الكرة الأرضية كلها ثم أقول للسائق اللامواخذة الذي نزل هو الآخر من سيارته "إيه يابا.. حرام كده والله .. ده تاني مرة العربية تتخبط في أقل من خمس شهور!".. يعتذر السائق ويتعلل بأن" الراجل اللي قدامك هو اللي وقف فجأة يا أستاذ وبعدين جري".. ثم يظهر شخص ثالث عرفت بعد ذلك أنه سائق سيارة ثالثة اصطدم هو الآخر بالميكروباص من الخلف.. أتركهم يتعاركان معا وأنا أنظر في أسى إلى الجانب الأيمن الخلفي من السيارة وقد تهشم وراح لونه الأحمر وقد انبعجت الشنطة ولا أجدع لوحة سيريالية للمرحوم سلفادور دالي وتزيد الحمم بداخلي عندما أجد السيارة الميكروباص بلا خدش واحد!
ثم يظهر أمين شرطة من اللامكان وهو يقول "رخصك يا أستاذ عشان نعمل محضر"..فأسترجع كل الذكريات الطيبة المعروفة عن رجال الشرطة وعن روتين المحاضر الذي سيضيع من عمري آلاف الساعات دون أن أنال حقا أو باطلا.. فأقول له "معلش اعفيني المرة دي.. هأمشي أنا وربنا يعوض علي" فيوافق مشكورا في سرعة لا أعرف لها سببا حتى الآن.. أركب السيارة من جديد وأنا أفكر فيما حدث وفي الاستبن المسروق منذ خمسة أيام فقط فأصرخ.. "هو ليه بيحصل لي كده؟!"

***
بس اللي هيجنني أن الحرامي سرق الكورة مع العجلة... طيب العجلة وهيبيعها.. الكورة هيعمل بيها إيه؟!

محمد هشام عبيه

الاثنين، 24 مايو 2010

عارفة



سلام عليكم يا اهل الهمسات

بعد غياب طويييييييييييل عدنا بقوة

المرة دي همستي جائت من أمام البحر

من خلف عالم لا يعرفه سوي قله من البشر

عالم دافئ هادي مختلف عن واقعنا المضطرب

أغنية عارفة ل علي الحجار

اغنية بتلخص حالة من الاحساس عالية جدا

انا مش عارفة أوصف اد ايه بحب الاغنية دي و لا ازاي بتاثر فيا

لكن هسيبكوا تعيشوا الاحساس مع صوت البحر

و دفئ الكلمات و روعة الحان عمرو خيرت


................


عرفه ...

مش عارف ليه متونس بيكي وكأنك من دمي ..

علي راحتي معاكي وكأنك امي
....مش عارف ليه....
عرفه ...

حاسس اني لأول مره بشوفك ..

واني بشوفك من أول لحظه ف عمري
حاسس اني يمامه بتشرب في كفوفك..

وانك شجره وضله وميه بتجري
مش عارف ليه ...

متونس بيكي وكأنك من دمي علي راحتي معاكي وكأنك امي
... مش عارف ليه ...
عارفه ...

فرحه كبيره وصوت مزيكا ف قلبي ... وكأننا حببين أتقبلوا بعد فراق
ليه فجأه بئيت مستني لوحدي.. ليه بتكلم واحكيلك واشكيلك همي
مش عارف ليه ..متنوس بيكي من دمي ..علي راحتي معاكي وكأنك امي
...مش عارف ليه...
وانا وياكي بحس الدنيا سلام وامان ...وان العالم مفهوش ولا نقطه احزان


ايدك خليها في ايدي انا طفل كبير...
وبحس انا وانتي لوحدينا والكون بستان...


مش عارف

...ليه متونس بيكي وكأنك من دمي ...علي راحتي معاكي وكأنك امي
...مش عارف ليه....


..............

الجمعة، 21 مايو 2010

ازاي تكون البحر وتكون شطوط غيرك !!





اتصل بي أحد أصدقائي الذين اعتز بصداقتهم كثيرا

يطلب مني مساعدته في حل مشكلة ما تواجهه

ففكرت معه وقلت له رأي وفقني له الله ففرح كثيرا بكلامي

ووصفني بالحكيم لأني أشرت عليه بهذا الرأي

ففكرت في كلامه هل أنا حقا الرجل الحكيم الذي له القدرة

على إعطاء روشتات العلاج للناس ؟؟

بعدها بيوم

ركبت سيارتي شغلت الكاسيت فوجدت على الحجار ينتظرني

على الكاسيت ويغني تلك الأغنية

"ازاي تكون أنت وتكون عيون غيرك

وتشوف ظلام نفسك تلمح أمال غيرك ...

ازاي تكون البحر وتكون شطوط غيرك "



فكرت في تلك الكلمات وعرفت بعض الحقائق ....

عرفت أننا كلنا نملك الحلول لمشاكل الآخرين .

عرفت أننا نفكر جيدا وبحكمة حينما لا تكون المشكلة متعلقة بنا!!

وتيقنت أننا لا نستطيع أبدا أن نكون حكماء

في حل مشاكلنا إلا إذا فكرنا خارج الصندوق

وتعجبت لماذا أقدم حلاً حكيماً لمشكلة ما!!

وحينما تواجهني نفس المشكلة أعجز عن حلها !!

لماذا نهاجم من يرى الحق ولا يتبعه

وكثيرا ما نكون ذلك الرجل؟؟

هل حقا يصدق فينا القول حينما نتكلم كلنا أصحاب مبادئ

وحينما نعمل كلنا أصحاب مصالح !!!

وفجأة قمت من غفوتي فوجدت الحجار لازال يردد

ازاي تكون البحر وتكون شطوط غيرك !!


احمد رفعت السعدني

الاثنين، 17 مايو 2010

أغاني في حياتي




النهاردة الصبح عرفت إن أكتر حاجة بتحسسني بسعادة لا توصف

هي إني أسمع أغنية بحبها بقالي كتير ماسمعتهاش

و أغني معاها بصوت عالي


كنت حاسة إن قلبي من جوا هو اللي فرحان

الأغنية هي أغنية علي الحجار "أنا كنت عيدك"...

على الحجار بالنسبالي هو أكتر مطرب بيعرف يختار كلمات أغانيه...

ماسمعتلوش أبداً أغنية كلماتها وحشة

(مش عارفة بالنسبة لشريطه الجديد عشان ماسمعتوش)



**


أكتر أغنية بحبها في الدنيا هي أغنية فيروز "زعلي طوّل أنا واياك"...

غير إنها أغنية رائعة فهي بتفكّرني بفترة من حياتي وانا صغيّرة...

كانت على شريط مسجلاه أختي الكبيرة و لظرف من الظروف

اضطريت إني أقعد في البيت أنا و أختي لوحدنا فترة...

فكنا كل يوم بالليل نسمع الشريط دا...

و قررنا إننا نعمل رقصة بخطوات معيّنة لأغنية فيروز


وبعد سنين كنت بمقهى في وسط البلد (في لبنان)

بشرب القهوة الصباحية بتاعتي و كان الصبح بدري

على الساعة ستة تقريباً (اللي هو وقتي المفضل من اليوم)

و كان المقهى دا وسط عمارات من الطراز القديم

(اللي هي النوع المفضل عندي من العمارات)

فكنت بحالة نفسية جيدة جداً...

و بعدين و لدهشتي الأغنية دي اشتغلت

من بعد ما كان بقالي سنين ماسمعتهاش


فالأغنية دي بقت أحلى أغنية في حياتي

**


تاني أحلى أغنية في حياتي هي أغنية علي الحجار (برضه)

"لو مش هتحلم معايا" عشان هي أكتر أغنية أثرت

فيا كلماتها و حسيتها قريّبة جداً مني...

و الحقيقة الأغنية دي سمعتها من فترة

مش طويلة خالص بس الأكيد إنها أضافتلي

في شخصيتي حاجات حلوة كتير

**

طول عمري بسمع أغاني و بستمتع بيها و بحفظها...

بس كان لما الناس اللي بتديها أهمية كبيرة جداً

في حياتهم يسألوني بتعنيلك إيه الموسيقى بقولهم

إنها مابتعنليش أي حاجة و لو مافيش موسيقى

في الدنيا مش هتفرق معايا...

بس من قريّب جداً أدركت أهميتها و قدّرت نعمتها...

عشان هي الحاجة الوحيدة اللي ممكن تحسّن من موودي

اتغيّر نفسيتي للأحسن لما أكون متضايقة أو مكتئبة...

أو تحسسني بالسعادة لما بتيجي بالصدفة البحتة

و انا مش متوقعة السعادة دي خالص


**



الجمعة، 14 مايو 2010

اعتراف




زمان واحنا صغيرين كل واحد فينا بيبقي ليه حاجه تضايقه أو تخوفه

أيوه عارفه أنا الناس اللي بتحط الغطا علي وشها وهيا نايمة



أنا كنت نفس البنت اللي في الصوره دي

كنت بحلم بالحلم ده وبيتكرر كتير

احنا متعودين عموما بنفتح الراديو بليل وبنسيبه شغال عادي


كان في برنامج قبل الفجر بييجي موسيقة

البدايه بتاعته بيغنيها علي الحجار

كنت دايما باصحي من الحلم ع البرنامج ده

ومن يوميها اي نعم انا لما كبرت مبقتش احلم الحلم ده


ومبقتش انام قبل الفجر اصلا

بس لو الراديو مقتوح بقفله في وقت البرنامج ده

ولو غصبت علي نفسي اني اسمعه

بيبقي يوم باين من أوله

مع اني مكنتش بخاف من حواديت امنا الغوله

وابو رجل مسلوخة والعفاريت زي باقي العيال

وبابقي قاعده مستمتعه وأنا بسمعها

بس تقريبا كله كان بيطلع عليا في الحلم

اييييييييييييييييييييه دنيا

زمان كنا بنخاف من حاجات خرافية أوي وهبله

بس لما كبرنا بقينا بنخاف من حاجات واقعية

ومن بكره والزمن والمستقبل

morgana

الجمعة، 2 أبريل 2010

عندما يغني علي (تجيش نعيش)


هاجمنا الذكريات صدفة على الرغم من اننا نحملها طول الوقت


فاليوم كنت اعبث فى الفولدرات القديمة على الجهاز لاكتشف مجموعة محببة

من اغانى على الحجار ناهيك على اننى احب كل ما يشدو به الا ان هناك

مجموعة اصطفيتها لنفسى اسمعها من حين لاخر وقتما يحلو لى المزاج

لكنى اليوم لم اختار فقط وضعتها ببرنامج تشغيل الموسيقى لتنطلق و تحلق بى بعيدا

و الى اعلى و الى الوراء نحو ستة عشر عاما


كانت اغنية تجيش نعيش "مكسرة الدنيا" قبل حفل خطوبتى باسبوع


اسمعها بالشوارع و التلفاز و اقتنيت الشريط الخاص بها فلم يكن احد

بعد يسمع عن حمى السى ديز المنتشرة حاليا


كان المسجل و فقط تضغط زر التشغيل للامام و الى الخلف

عدة مرات حتى تصل الى الاغنية التى تبتغيها


كنت ابنة ال 16 احمل احلاما وردية خضراء و فرحة قلب

سيرتبط بمن احب بعد اسبوع واحد فقط


مشاعرى تلمع فى عز الظهر فتفيض اشراقا على وجهى


و امى تحذرنى من كثرة المشاوير " هتتحسدى اهدى شويه "


بنات الجيران يتسائلون عن قيمة الشبكة اقول فى سعادة خاتم و دبلة

و حفلة بسيطة فمنهم من تبحلق مندهشة و من تمصمص شفاهها

ومن تبتسم و هى تقول ربنا يتمم بخير


انا لا اريد شبكة ولا اهتم لامرها هل ما اشعر به سيزيد بها و يقل ان قلت ؟


ماذا اتمنى اكثر من انسان يتقى الله و يحبنى , لا اسمع كل الهمس


و الحوارات و النظرات الخبيثة بعض الاوقات


هناك شيىء ما يمنحنى الامان و السكينة و الفرح يكفينى هذا تماما

فى يوم الخطبة ذهبت للكوافير فى حوالى الثانية ظهرا و كنت اتعجب

لما كل هذا الوقت من الثانية وحتى السابعة مساءا !!

تجمعت حولى صديقاتى و ابناء عمومتى و بنات الجيران زغاريد

و رقص و فرح يحاوطنى و يحملنى و يهدهدنى على ارجوحة الحلم الاخضر


كلما اقترب ميعاد وصوله شعرت بمزيد من التوتر و "اللخبطه "


احداهن تهمس خلى بالك انتى على شماله وهو على يمينك "عشان تبقى جمب قلبه "


لا اريد ان اكون بجانب القلب اريد ان اكون بداخل القلب

فلا يضير ان كنت على الجانب الايسر او الايمن وقتها


امى متألقة فى تايير ستان لبنى سماوى تجيىء لتقبلنى

و تبكى و تجفف دموعها و تنشغل قليلا ثم تأتى لتكرر نفس المشهد من جديد

ها قد وصل يبتسم فى هدوء لا اعرف من اين اتى بالهدوء

وانا متوترة بشدة و يداى باردتين و ارتعش قليلا


اتأبط ذراعه الايمن و تعلى اصوات الزفة و دقات قلبى اعلى منها

نركب سيارة عمى وقد زينها بالشرائط الملونة

و ينطلق فى دورة واسعة حول البيت ثم الى القاعة التى سيقام بها الحفل


نخطو داخل القاعة فتتلقفنى الف عين مهنئة و كنا قد اتفقنا على تقديم العصائر

و علب البونبون و الشيكولاته فقط ففوجئت بابناء عمى قد قاموا

باحضار ما يزيد على عشرين دستة جاتوه و اطباق و شوك الخ ,,,


غنى مطرب الفرقة الموسيقية اغانى كثيرة و جميلة و طلبت اغنية تجيش نعيش

فقال انه لا يحفظها فغناها لى ابن عمتى وهو عذب الصوت بالفعل

ينظر لى خطيبى فلا استطيع ان اطيل النظر فانظر ارضا او جانبا

و دقات قلبى تتسارع كأنما هى فى سباق لتتخطى بعضها البعض


يلبسنى الدبلة و الخاتم و البسه دبلته الفضية و ينتهى الحفل

يتقدم احد اصدقاء المرحوم والدى بدعوة للعشاء لنا

فى دار الدفاع الجوى فننطلق الى هناك

و انا التى تجيد الثرثرة صامتة !!

هو الوقت الذى لا تحتاج فيه الى الكلام فكل شيىء

باد ويتحدث بافصح من لسان شاعر..


جلسنا على مائدة جانبية عليها كعكة محلاة و ورود و شموع صغيرة

و هناك موسيقى هادئة تنبعث من مكان ما لم احدده


ينظر لى طويلا فانظر الى المائدة وانا اقول : متبصليش كدا

:مش خطيبتى

:ايوا بس متبصليش كدا ..

نقتطع جزءا من الكعكة و نتشاركه و نقوم للتمشية فى حديقة بجانب المطعم

نتحدث بعض الوقت و اشعر بالبرد فلقد كنا باوائل ابريل

و كان الطقس يميل للبرودة ليلا فاقترح ان يعطينى جاكت البدلة الخاص به


فرفضت

:اولا انت هتبرد,

ثانيا مفيش عروسه بتلبس جاكت بدلة رجالى فوق فستان خطوبة

احدهم ينادى علينا لقد تخطت الساعة الواحدة و امى تريد العودة للمنزل


نعود فيجلس معنا نصف ساعة و يستأذن فلقد تأخر الوقت للغاية


يهمس قائلا : مضطر امشى برغم انى مش عاوز امشى

كفايه كدا عشان مامتك متضايقش مبروك حبيبتى


: هاه ... مبروك

ينزل و ارتمى على سريري و انا مبتسمة و الفرح يغمرنى

والحلم يدغدغنى , اضغط زر التسجيل فيشدو على الحجار و بقولك

ايه تجيش نعيش هوا نبتدى ولا ينتهيش ..

noor

الجمعة، 22 يناير 2010

روحي فيكِ


للصباح رائحة ملابسكِ ولروحي مذاق رقصتكِ الغجرية ،


احبّيني مجّانًا لأن الكونَ منغمسٌ في لذتهِ يحتضنني !


يا الرؤيا الحريّة بالفرح ، هاصرتَ يا حصانَ القلبِ مَرتَعًا للإيقاع ،


أرقصُ أرقصُ أرقص في عشيّة ماذا ، لا أدري ،


لا ثورات قريبة ، فقط ثورات .



الإيقاع ، يا رحيق الزمن ، ووردةَ السماوات ،


آه ويا لالالالالاااااه آه يا لالالالالالااا ويلالالالالالالالالاااااه


قبل ما تدب خطاكي بدوب واتحرق من الشوق الملهوب


واتوجع كلفهد المجرووووووووح


ها مسوّداتي تطير كإوزات بيضاء مرحة ،


ولكوب الشاي مذاق البهجة ،


ابتهجوا لأن الوجود صحو والنهار مرح ،


تستطيع القاسية أن تمزق جسدي إربًا بخطوات رقصها ،


أريد أن أتفرق على الرمال ، لكل ذرة رمل قبلة .


هيا أيها الإيقاع ، مزق الجسد بلسانك الشهيّ .


وما إن يتبدّا لي محياكي وأدوق الرحمة


بنبع هواكي بساتين الفردوس تلوح ،


روحي فيك تروح ، دوح جميل الروح .


ها يتناغمُ سقوطي في شفتيكِ الصعبتين


مع صعود لواء الماء في حلقي ،


حسبك شتيتي العقل اشتات وجنيتي نجوم السموات


وعدّيتي الحسن المسموح ،


ان قلت وداع انقسم اتنين فارس متمرد على صمت الكون ،


آه أنا همس هذا الكون ، ثم صراخه وانتشاؤه ،


أنا رقصة الكون !



أرقصُ أرقصُ أرقصُ لأن مدارات الحزنِ عصيّة على القلب ،


الطفل الذي يقذف عملاته المعدنية ،


تحت تنورة المرأة الفاتنة ،


التي تشاهد البحر ، وينحني ، ليرى أحمرَ الورد ،


وجنّة العسل . أغمض عيني لأفتحها على الطريق الراقص ،


ولهان ف موجاتك سبحان محاوطني المي وظمآن ،


وروييني لا الشوق يبوووح !روحينا بين الأرواح


بيتلاقو صافيين ملاح بفردوس العشق المفتوح .


آه يا فردوس الماء ، ألهب حلقي .



يا أظافركِ اللذيذة ، أرسمي الجناحين الأحمرين لظهري ،


دعي تصفيق روحي يشبه الطيران إليكِ .


روّيني لا الشوق يبوح ،


هذا النخل في شرق الجسد ، مبتلّ بالنار ، ومدجج بالتمر ،


يهرّب النور عبرَ قلبي ، إليكِ يا وردة الكونِ السري ،


يا لبؤة روحي الراقصة .


أرقصي ، كشعلة ملتهبة ، أرقصي على جثتي الممزقة


احتفالا بإيقاظ الإله في قلبي ،


الاحتفال رقصًا حتى الموت والحياة . الفراديس التي ترقص


الكان كان في صف طويل ،


ترفع أقدامها لتظهر الحوريات الزرق ،


لم يطمثهن من قبل إنس ولا جان .

أرقصُ أرقصُ سيوف الإيقاع تمزقني لأشلاء ،


كل شلوٍ مُجتاح بالنغم . الموسيقا يا أنتِ روحي


المحلّاة بلسانكِ الحية الدغدغة والبركان .


آه اللذة كعصا موسى ،


ترسمُ البهجة على عيون جمهرة الأطفال ،


كلكم ستكبرون ، ستصيرون أطفالا مثلي .


هرمس

الثلاثاء، 3 نوفمبر 2009

مين أحمد و مين الحاج أحمد؟؟



نوكيا هاتوه من آي تو..


أحمد مش زي الحاج أحمد


كل يوم بأسمع الإعلان ده في الراديو


وأنا رايحة الشغل،


و أشوفه على الكوبري برضه.


بيقولك يا سيدي ..


ضمان أحمد مش زي ضمان الحاج أحمد..


أيوة طيب مين فيهم آي تو يعني؟؟


أفهم من كده إن أحمد ده الشاب


الآي تي بتاع التكنولوجيا


و الحاج أحمد ده الراجل الأولد فاشون ..


و بالتالي يبقى طبعاً أجيب التليفون من أحمد.


و لا يمكن برضه أحمد ده الشاب المستهتر


و الحاج أحمد ده الراجل الخبرة في السوق


و بيعرف يراعي الزبون..


يبقى لازم أشتري نوكيا من الحاج أحمد؟


حد ينورني يا جماعة؟؟


مين أحمد و مين الحاج أحمد؟؟


يعني مين فيهم الكويس؟؟


و بعدين على أي أساس


آي تو حطت المقياس يعني؟؟


أحمد و الحاج أحمد زعلانين


قوي من التشنيع عليهم


و أحمد رايح يحج و مفيش حد


حيبقى أحسن من حد



***

عندي مشكلة تانية..


بأشوف تامر حسني كتير في الشارع،


أيوة بجد..


نفس الشعر و النظارةالكبيرة


(إللي هو بيقلد بيها إنريكي إجلاسياس)


و الدقن الطويلة و الأنيل بقى


لما كان في واحد فيهم شايل


جيتار على ظهره..


أصلاً تامر ده هايف


و زور علشان يفك من الجيش..


يعني مش مثل أعلى خالص..


و لو إن هو ده يا عيني


إللي الشباب محتاجه..


يخلعوا من الجيش و يسبلوا


للبنات و يأكلوا مخهم..


كلهم بقوا تامر



Arabic.
trackback




عباس العبد

سيبك من ان التليفون الى معاكى موتورلا


و حتغيرى و تجيبى سيمنز


و سيبك من ان تامر هو صاحب صوت قوى



ذى دلالات حنجورية متميزة


و سيبك من ان الوله احمد ده


صايع و معندوش شغل


و بدا ببيع نغمات و لوجوهات



و ان الحج احمد ده مش


هو لكن ده واحد تانى


موسى الحريري

يا أخ عباس لما تامر يبقي صاحب دلالات


حنجرية متميزة يبقى الاستاذ علي الحجار ايه


(اسمع علشان تحكم)


الاثنين، 28 سبتمبر 2009

تذكره حفله علي الحجار


تذكره حفله علي الحجار

عن شهرسبتمبر 2009

في ساقيه الصاوي


التذكره ب35 جنيه للاعضاء


و40 جنيه لغير الاعضاء


يوم 30 - 9 - 2009


التذكره خاصه بالصديقه هاله مدحت

الجمعة، 25 سبتمبر 2009

عيشة تقرف



بقلم محمود الكردوسى



مرة واحد كئيب سأل صديقه: «إيه أخبارك»؟..



فأجاب، صدقاً أو كذباً: «زي الفل».. فبهت الكئيب،



وضرب كفاً بكف، وتساءل مذهولاً،



مفجوعاً: «زي الفل؟.. يا نهار أبوك إسود!..


وشرفي لأبلغ عنك أمن الدولة»!.



الحكاية حقيقية، وبطلاها حقيقيان،



ما زالا علي قيد الحياة، وكان قد رواها



لي صديقي إبراهيم داود في قعدة عطالة..



لا أذكر إن كانت في أحد بارات وسط البلد



أم في كافيتريا مؤسسة الأهرام،



حيث «نعمل ولا نعمل»، وقليلاً ما نلتقي..



قليلاً جداً.

لكننا بين الـ«نعمل» والـ«لا نعمل»..



نختلس - كعشرات العاطلين -



لحظة سعادة، فيها أكاذيب رائعة:



«ما تيجي نعمل جرنال تابلويد نكتب فيه



براحتنا ونصرف عليه من حر مالنا


ونوزعه علي أصحابنا بإيدينا»..



وفيها حسرة علي أنفسنا:



«صلي ع النبي يا أبو خليل..



اليومين دول مش بتوعنا.. خلينا متدارين



وما تبوظش القعدة.. اطلب لي بيرة».



بعد البيرة والقعدة الحلوة أعود إلي أجندتي.



يسأل الواحد صديقه: «مالك.. شايل طاجن ستك ليه»؟.



فيزم شفتيه ويرد ممتعضاً: «مفيش»..



والحقيقة أنه يتنفس نكداً ومللاً وإحباطاً وحيرة،


لأن اللهاث وراء لقمة العيش لم يترك



لأي منا لحظة سعادة، حتي إذا كان



الرزق فوق الاحتياج: «مش عارفين ننبسط»..



قالها أحمد محمود، صديقي الموهوب،



وكنت أعتقد أنه سيأخذ مني، ويخفف حملي،



فاكتشفت أن «الحال من بعضه»،



وأنه مثلي ومثل كثيرين في بلاط هذه المهنة،



ضحية لضميره اليقظ وموهبته الأوسع



من كل قوانين الطبيعة: «مفيش حافز يا دكتور..



مفيش نفس ولا وقت ولا ناس لمعناة الكلام يتلوه..



سمعني علي الحجار».



تركب مع سائق تاكسي وأنت تهمس لنفسك



بأنه ربما يكون أمن دولة ويحاول أن يجر



شكلك ويستدرجك، بادئاً بالكلام عن



الشبان الذين يراوحون بين البانجو والفياجرا،



وعن البنت «اللي لسه ما طلعتش من البيضة»



وطلبت منه عشرين جنيهاً مقابل أن يقضيا



معاً ليلة حمراء: «ما تخافش يا اسطي.. السكة سالكة..



المهم المكنة - يعني المكان - والواقي الذكري»..



ومنتهياً إلي حديث التوريث والتعذيب



والتهليب والتزوير و.. «آخرتها يا بيه»؟.



تذهب لشراء فاكهة فتفاجأ بأن كل الأسعار


تحركت وأنت واقف كالأبله، ثم تكتشف زوجتك


أن البطيخ ماسخ والعنب مر والمشمش مليان


دود والتين حمضان وخيبتك تقيلة.


تفتح الباب للمكوجي وفي يدك عشرة جنيهات كالعادة،



فيطلب عشرين لأن سعر طن الحديد


وصل إلي سبعة آلاف جنيه:


«يا ابني إيه علاقة الحديد بالهدوم؟».


«تمر علي الحلاق وانت مش طايق


شعرك لأنه ثقيل و.. بيلم عليك وساخة الشارع»،


فيخرم الحلاق رأسك ويشفط مخك ويضربه


في خلاط، ثم يعيده إليك بعد ساعة وقد أصبح


طبق يخني. تنام إلي جوار زوجتك آخر الليل

وتحاول أن تناغشها: «فاكرة يا سوسو!..


فاكرة أول مرة قلت لك بحبك»؟..


فتستدير وهي تنفخ وتتأفف، وترد بعد


أن يكون قد استوي: «التلاجة فضيت».


تقرر أن تخونها ولو بفتاة تحبها «من غير أمل»،


فتكتشف أن قلبك مات، وأن الحب مجرد «حوار»


كما يقول «الفيس بوكيون»، وأن قلب الفتاة


لمن يدفع تكلفة جسمها وتاكسياتها وشريحة


محمولها وقعدتها في الكوفي شوب.


تشجع الأهلي فلا تشعر بلذة القلق لأنه بلا منافس.


تشجع الزمالك فتحزن لأنه ابتلي بشخص يدعي


مرتضي منصور. تذهب إلي السينما فتنام من التعب.


تسمع أم كلثوم فتزهق من طول الأغنية.


تفتح النت فتشعر بأنك «اتربيت غلط».


تقرأ الأهرام فتشعر بأن مصر أم الدنيا ومبارك أبوها.


تقرأ الجمهورية فتشعر بأنك في السويد.


تقرأ العربي والكرامة فتشعر بأن عبد الناصر هو الحل.


تقرأ الدستور وصوت الأمة فتشعر بأن البلد


«رايحة في ستين ألف داهية». تقرأ الفجر


فتشعر بأن مصر جائعة ولا تأكل إلا بثدييها.


تقرأ الأسبوع فتشعر بأن الوحدة العربية


خير من جليس السوق.


تقرأ البديل فتشعر بأن تسعة عمال معتصمين


أمام خزينة مصنع سيشعلون ثورة بلشيفية جديدة!.


سأوفر عليك وأسألك قبل أن تتهمني


بأنني كئيب ونكدي وسيادتك


«مش ناقص غم»: هل أنت سعيد؟



أنا عن نفسى مش سعيد ..


بس الحمدلله راضى باللى


ربنا قسمهولى .. فى معظم الوقت

ببص للناس اللى مستواها

المعيشى أقل و أقول الحمدلله

أنا أحسن من غيرى كتير ..

ربنا يديمها عليا نعمة

و يخلينى دايما راضى و يرضى عليا


ها .. إيه رأيكم .. إنتوا سعداء ؟؟

الخميس، 17 سبتمبر 2009

نماذج.. من تهاني وتعازي الجرد السنوي!


فرفور

إضغط لتكبير الصورةمازالت المنافسة للحصول علي


لقب «ملك النشاز»


شديدة بين كل من إيهاب توفيق ومصطفي قمر


وقد اقترح منير الوسيمي نقيب الموسيقيين


أن يدخل «أحمد برادة» طرفا ثالثا!..



في حواره معي بالتليفون عندما طلبت منه أن يشبه


الممثلات الآتية أسماؤهن ببعض الأكلات المعروفة


أجاب قائلا:


سمية الخشاب «طاجن عكاوي»..


منة شلبي «فتة كوارع»..


إلهام شاهين «صينية بطاطس»..


عبلة كامل «حلة كشري»..


أميرة العايدي «ملوخية»!..


ثم اختتم المكالمة بقوله: ماتعليقك؟!..


صرخت وأنا اغلق التليفون في وجهه:


ملوخية إيه يا أستاذ.. أنت عاوز «تزحلقنا» علي المحكمة؟!..


بالرغم من أن «الملوخية» أكلها يجنن!..



ما من إنسان مهما بلغ من ثقل ظل قفشاته


التي يلقيها علينا إلا ويري في نفسه


أنه أخف ظلا من المنولوجست المختفي «عادل الفار»..


ولكي تتأكدوا من صحة كلامي قارنوا بين


نكت ممتاز القط في الصفحة الأولي من أخبار اليوم


ونكت عادل الفار التي تجعلنا نستلقي علي أقفيتنا


من شدة الضحك!.. بالفعل إن غاب «الفار» العب يا «قط»!



خالد يوسف.. مخرج يشار إليه بـ «كامل العدد»!


تصفيق الجماهير.. امتياز لايحصل عليه إلا عباقرة


الأداء من أمثاله! اتحدث عن الممثل الداهية خالد الصاوي!


بعد قيام تامر هجرس ببطولة فيلم «البلد دي فيها حكومة»


انتظروا منافسه الخطير أحمد نظيف في


فيلم «البلد دي فيها فساد» من تأليفه وإخراجه


وبطولة بعض من حوله!.



عفاف راضي هل لا تزال علي قيد الحياة؟!..


آسف أقصد علي قيد الغناء؟!


هل تعرفون المدعو طارق عبدالحليم؟!


أنا أعرفه.. طارق عبدالحليم نموذج لفصيلة


من الناس تسأله عن مهنته فلا يخجل


من أن يقول لك إنه مطرب!..


أو أن تضربه بالبوكس فيصرخ قائلا:


ياليلي ياعيني آه ياعيني معتبرا هذا التوجع وكأنه غناء!


وقد شاهدت المذكور في أحد البرامج المعادة


علي قناة فضائية يجلس جلسة الشاعر المثقف


أحمد عبدالمعطي حجازي مرفوع الهامة عريض المنكبين


ولكن عندما جاءت له الفرصة للكلام


تكلم علي طريقة «العبيط» الراحل يونس شلبي


في مدرسة المشاغبين!..


قال وهو «يتهته» بأنه لايقدم للجماهير الأغنية


المنحطة ولا الأغنية المايعة وإنما يقدم الأغنية الشعبية


التي تتناول أوجاع الجماهير وقضاياهم بكلمات


غير مسفة وإنما بكلمات محترمة ذات مفاهيم


واسقاطات رمزية تشبه «المنشور السياسي»!


وعندما سألته البنت المذيعة: زي إيه مثلا؟!



أنبري «يجعر» وهو مازال مرفوع الهامة عريض المنكبين..


زي الأغنية اللي باقول فيها


«بتكلمنا بحواجبك ومافيش حد عاجبك!..


عزيزي طارق عبدالحليم بتاع القضايا الاجتماعية


والمفاهيم السياسية..


يحطوا لك ع الفتة شعبان عبدالرحيم!..


صلاح السعدني.. فنان قدير ومثقف


غير عادي عنده لكل سؤال جواب


هذا بالإضافة إلي أدواره التي يقدمها والمنتقاة بعناية شديدة!..


بارك الله له في أدواره التي أعز بها شاشة التليفزيون والسينما!..



علي الحجار: الغناء الجميل الذي يجعلنا نهتف


عند سماعه «أعد» كمان والنبي كمان.. سمع هس!..



الملحن الكبير اسمه «موسيقار»..


عمرو مصطفي اسمه «مقتسبار»!


أحمد فلوكس نجل الصديق فاروق فلوكس..


أشهد علي إنه نجم السنوات المقبلة..


الشهادة لوجه الله لا لوجه والده!



خرج ولم يعد المدعو «شادي شامل» الشهير بـ «العندليب»


أما مواصفاته قصير القامة.. رفيع القوام.. قمحي اللون..


ذو اشعر أصفر وأحيانا اسود غامق..


الحواجب مشجرة.. يرتدي بنطلونا وقميصا اضطر لخلع


أزراره متعمدا حتي يظهر شعر القفص الصدري


اشبه بالزملاء تامر حسني وتامر عاشور وتامر قمر


وبقية عائلة «التوامر» إياها!..


المذكور خرج منذ ثلاث أغنيات ومسلسل تليفزيوني


ولم يعد بالرغم من أن الوالدة قلبها اتحرق..


والوالد ضغطه عال علي اختفائه أما الجمهور


ففي منتهي الزأططة.. فلا داعي للعودة!..



مجدي كامل.. «الزعيم» بحق وحقيقي في مجال التمثيل!


رامز جلال.. في كل البرامج التليفزيونية التي ظهر


فيها برهن علي أن برودة استظرافه لاتطاق!


من خلال أدواره وآدائه المتميز تستطيع أن تتنبأ له


بالنجومية بل ربما مبعوث عالمي قد يخلف المبعوث


الحالي عمر الشريف بعد عمر طويل!..


أتحدث عن المبدع آسر ياسين.


هاني شاكر صوت حساس!..


مدحت صالح صوت حالم!..


محمد الحلو صوت واحد بيعرف يغني!.


. حمادة هلال صوت واحد عنده «امساك»!



محمد نجم «زعيم» من زعماء الكوميديا الذين يضحكوني جدا!..


أحمد رزق ومحمد سعد ورضا أدريس وعادل سليمان


وسامح ياسين أنصاف وارباع زعماء!..


مي فاروق.. المطربة بفرقة الموسيقي..


صوت بطعم الملبن المحشو بـ «الدو.. ري.. مي.. فا.. صو»


من يستمع إليه «يطرب» مايسره أو بالتعبير إياه يجد مايسره!..


حالة قناة «نايل كوميدي» تذكرني بالرجل


الذي كان ينادي في الشوارع قائلا:


بنطلون قديم للبيع.. جزمة قديمة للبيع..


ساعة لقلبك قديمة للبيع..


أشرف عبدالباقي قديم للبيع..


أفلام قديمة للبيع..


نكت قديمة للبيع..


روبابيكيا!..


الأحد، 13 سبتمبر 2009

سلطة عربى



بدأ الامر باغنية باب الخلق للمبدعين سيد مكاوى وفؤاد حداد

ولا ادرى لماذا صارت هذه الاغنية

ترتبط لدى شرطيا بالعيد ...عيد الاضحى تحديدا

ولكن بعدما استمعت اليها ليلة الوقفة

ونتيجة
لملابسات غريبة انقلب مزاجى

الى مزاج عربى فجاة وانا التى لى سنوات

لا استمتع بالاغنيات العربية وحدها

ولا تعمل لى دماغ بالمرة بمعزل

عن اغنيات او مزيكا اخرى



وجدتنى استرجع اياما بعيدة ايام طفولة

لم اكن اعرف فيها سوى الالبومات

التى تبتاعها امى ذات المزاج الخاص

تربت اذناى على ميادة الحناوى

فى غنائها لبليغ حمدى خاصة التى اعتادت

اذنى الحانه واحبتها وارتبطت بها

وعلى الناحية الاخرى كان ابى الذى

يكن عشقا خاصا لفريد الاطرش

ويشترك مع امى فى حب ام كلثوم



ورغم ثورتى عليهما وعلى ذوقهما

الموسيقى لاكون حليمية المزاج

الا انه ظلت اذناى مطواعتان مستسيغتان

لما يسمعه كلاهما لتتربى روحى بالموسيقى

تربية غريبة تتفق مع طبعى الاغرب


فى تلك الفترة - نهايات الثمانينات -

لم اكن قد تجاوزت السابعة ،

كان هناك تيار جديد يتشكل -

لم تحبه امى صاحبة الاثر الاكبر فى

تشكيلى بطبيعة الحال- كان حميد الشاعرى

يحشد لبدء تيار غنائى جديد سرعان

ما تسيد المشهد قبل ان يخرج القطيع

عن سيطرة الراعى ويشرد ليفسد الغناء

باكثر مما تصور الراعى نفسه حتى انقلب

القطيع على الراعى بالمعنى الحرفى للكلمة

ليدفع هو الثمن فى فترة سقط فيها الشاعرى

ولم يقف بعدها ثانية ابدا

ما علينا

المهم انه قبل صعود وانهيار حميد الشاعرى

كان هناك سكة اخرى تماما فى المزيكا

سكة فيها جنوح للعودة الى

الجذور الموسيقية المستقاة من الفلكلور

او القوالب الموسيقية العربية القديمة

الى عرفت فى نهايات القرن التاسع عشر

وبدايات القرن العشرين كان سيد مكاوى

وكان احمد منيب سكة مختلفة برزت

اسماء لملحنين وشعراء فى تلك الفترة

لا اعتقد انه من الوارد ان يتكرروا

كعبد الرحيم منصور الذى تالق نجمه

مقدما للمطربين فى البوماتهم الاولى

صانعا منهم نجوما بغناء مختلف وكلمات مصرية

للغاية لم اسمع مثلها من سواه




ولعل عدد منكم يذكر اول اغنية فى

اول البوم لعلى الحجار "
على قد ما حبينا "

الاغنية التى ظهرت نهاية السبعينات

لتعلن مولد غناء جديد ليس كمثله

غناء اخر فحتى الغناء الشعبى

فى الثمانينات كان امرا مختلفا رغم وجود

الاساتوك الذى هو بيتوك واشتهار الثمانينات

بكونها الحقبة التى غنى فيها
طبال ام كلثوم


فى تلك الليلة ذات الملابسات

وبينما يستعد الناس للاحتفال باول ايام العيد

عادت لى الثمانينات بقوة وجدتنى

مشتاقة للاستماع ل
عمر فتحى



يالله كم ان هذا الصوت مسكون بوداعة وحنو


كان يرن فى اذنى بدون اى مبرر مقنع


موشح عجبا لغزال قتال الذى غناه عمر فتحى

استمعت اليه مليا بعد ان بحثت عنه

فى الانترنت بجنون ثم اشار لى الاستاذ احمد شقير

الى وجود ذات الموشح مغنى بصوت فؤاد عبد المجيد

ملحن الاغنية قبل ان اتذكر سريعا ان عبد المجيد

هو ذاته من لحن وغنى
موشح اه لقلبى والقمر

بحثت عن هذه الاخيرة حتى وجدتها

واخذت استمع اليها مرارا وتكرارا



عفوا توقفت هنا واحتفظ بباقى التدوينة

لنفسى لدواع شخصية اعرف انها

مبتورة ومنقوصة ولكن ليست بى طاقة

الان للكتابة واستخسرت اللينكات بصراحة

خاصة وانه من الجيد ان يتعرف من لا يعرف

منكم على غناء ومزيكا مختلفة بسيطة وجميلة

اليكم التدوينة كما كتبت دون تعديلات

منتغيير العنوان واقتطاع جزء خاص

وشخصى للغاية


الثلاثاء، 11 أغسطس 2009

استهبل واشرب بيرجل




أول مرة شوفت الاعلان العبيط ده

( إنكسر جوايا شئ وانطفت بعده المشاعر)

زى عم على الحجار كده خبط لزق ..

وزعلت على نفسى قوى ..

إزاى ما خدتش بالى السنين دى كلها ..

ياه يا جدعان ..

هو إحنا رايحين على فين

وإيه قلة الأدب دى يا عالم ..

زمان كان بيقولوا بفلوسك

بنت السلطان عروسك ..

لكن دلوقتى بقت

بفلوسك بكرة الإعلانات تدوسك .




لكن وأه من لكن

اللى عاملة زى المساكن

يعنى بالعربى كده

اللى بيجى بعدها بيعمل مشاكل..

وبعد بحث وتجارب علميه مضنية

على هذا المشروب العجيب

تأكدت بنفسى من النتائج المبهرة ..

وبالفعل إزدادت نسبة الرجوله

بعد شرب المدعوق

ولكن للأسف عند الستات

يعنى إمبارح لمحت ست بشنب

قاعدة فى ڤينيكس

بشارع عماد الدين بتشيش ..

قلت وماله هرمونات زيادة

المهم مشيت شويه

قلبى ما طاوعنيش

قلت لنفسى ارجع يا واد

شوفها بتشرب إيه مع الشيشه

ولقيتها بتشرب بيرجل

بصراحة تنحت وروحت هايم على وجهى ..

وسرت وحدى شريداً

لغاية ما وصلت الامريكين

وهناك شوفتها من خلف الزجاج

ست زى القمر بس يا خسارة

بلحيه كثيفة من غير شارب

لأن اللى كان جنبها

هو اللى كان شارب المقلب

وفاكر نفسة قاعد مع ست

لغاية يا ريس ما شربت بيرجل

وطلعلها دقن معتبرة ..

بس كويس انها دقن بس

ومطلعهاش حاجة تانيه

كانت تبقى مصيبة .




لكن بجد قلقْت قوى

وخايف من اللى جاى ..

يعنى ممكن يجى اليوم

اللى اشوف فيه إعلان

بيقول أتنسون واشرب كرنب

وساعتها الواحد بعد ما يشرب

ويستكنيص ينعم

ويطلع له تضاريس ...

واخدلى بالك وشعره

يبقى على الهانش ... ووو...ووو






شيل إيدك يا قليل الأدب .





* ملحوظة تم استبدال اسم المشروب

اللى هو بيريل باسم اخر اللى هو بيرجل

علشان الاعلانات على المدونة

دى مدفوعة الأجر .


الثلاثاء، 14 يوليو 2009

في «السميم» قصدي في الصميم


في «السميم» قصدي في الصميم

< سألني من أين يأتي الصوت الذي يغني به هاني شاكر؟! - قلت : من قلبه!..

والصوت الذي يغني به علي الحجار؟!

- قلت : من حنجرته!..

والصوت الذي يغني به محمد ثروت؟!

- قلت: من رأسه!..

والصوت الذي يغني به إيهاب توفيق؟!

- قلت: من أنفه!..

والصوت الذي يغني به سمير صبري؟!

- قلت: من «......» عدم المؤاخذة!..



شبيك لبيك


فضفضات ....




فضفضات ....


- حوا اتزفت من غير طرحة من غير مهر و شرط فى عقد
الجملة دى من غنوة حوا و ادم للمطرب الجميل علي الحجار(و الشريط جيد جدا اسمعوه) و اجمل ما فيها انها بتكلم عن العلاقات و الجواز انه من غير شروط و مهر و مؤخر والكلام ده و هى دى الفكرة
احنا فى زمن الجوازات كلها بالصعوبة دى عشان كده بتكتر المشاكل او بيقل الجواز اصلا
صحيح الزمن ده محدش مأمن حد عشان كده كل واحد بيفكر فى الضمانات المادية من مهر و شقة و مؤخر مع ان الفلوس مش ضمان ابدا لكن اهو بيشوفه كده لان الحياه بقت مادية للاسف
يعني انا هعذر كل اللى بيفكر كده و بالضمانات دى بس انا مش كده انا لسه مش عايش فى الدنيا دى و الحمد لله و لا عاوز اعيشها
- مفيش كسوف فى المحبة ولا للمحبة شروط
هنا منير قالها بشكل اعم و قوي جدا بقى
يعني اللى هو من الاساس مفيش اى شروط بقى لا مادية و لا معنوية و لا عائلية و لا اى حاجة للحب خلاها الحرية الكاملة اللى مفهاش كسوف كمان
و المشكلة هنا هى وجود الحب الحقيقي الفعلي اللى يقال انه مبقاش موجود او نادر و انا حاسه موجود و انا عايشه كمان الحمد لله بس في خوف بسبب الظروف اللى بتعوق احيانا و من المستقبل عموما لكن اكيد متمسك بيه جدا و ده اللى مخليني صابر و بامل انه مع الوقت كل حاجة هتتحسن
- و ده حب ايه ده اللى من غيييير اي حرييية
يمكن انهاردة اكتر يوم حاسس اني فعلا يونس(اغنية منير) و اننا فى حب اوي فعلا لكن مفيش حرية و كل الظروف ادامنا فى الفترة دى برضه عارف ان الظروف دى بعضها هتنتهي بعد فترة معينة و بعضها هنقضي عليها سوا مع بعض لكن دى على مدى يخليني فى الفترة دى تعبان حقيقي بس مش فى ايدينا حاجة
- ربما يحصل غياب عن المدونة و يمكن حاجة ترجعني تاني بعد فترة قصيرة الله اعلم لكن هناك غياب قريب هيحصل اجباريا لسبب اجباري دخل حياتي و هو من الظروف اللى بتجبرني على الحياه زى ما هي عاوزة مش زى ما انا عاوز
- على قد ما حبينا و تعبنا فى ليالينا الفرحة فى مشوارنا تاني هتنادينا طول ما القلب صافي بحر العشق وافي كل عذاب الدنيا هيروق بكرة لينا
و يرجع على الحجار ليترك الامل باغنيته على قد ما حبينا و زى ما قال فى الاغنية الجميلة جدا دى ان ان شاء الله الفرحة هترجع و الدنيا هتروق
يا رب


قائمة المدونات الإلكترونية

  • اعتقال أمريكي بسبب طعنه للبطيخ بطريقة عدوانية - * يواجه أمريكي تهمة التهديد من الدرجة الثانية بعدما اشتكت عليه زوجته للشرطة إثر تعرضها للإرهاب النفسي حين رأته يطعن بطيخة بطريقة "عدوانية" أمامها ...
    قبل 12 عامًا
  • La lingua Italiana per stranieri - Katerinov - La lingua Italiana per stranieri - Katerinov Book: Download here ( djvu format ) Audio: Download here
    قبل 13 عامًا
  • مسرحية " ذكى غبى جدا " - *مسرحية " ذكى غبى جدا *" * بطوله : * *على الحجار* * و محمد سعد* * و ميمى جمال* *تحميل مجاني - Free Download* *Server* مشاهدة مباشرة اون لاين *a...
    قبل 13 عامًا
  • Pavarotti - Nessun Dorma (Live in Paris) - *ITALIAN;* *Nessun dorma! Nessun dorma!* *Tu pure, o, Principessa,* *nella tua fredda stanza,* *guardi le stelle* *che tremano d'amore* *e di speranza.* *...
    قبل 13 عامًا
  • برلمان التحرير - «حصاوى بالمقهى يجلس شاردا وبجواره جاره» الجار: سرحان فى إيه يا حصاوى؟ حصاوى: أصلى بفكر أرشح نفسى للبرلمان. الجار: هاهاى، دا أنت مغمى عليك يا حصاوى، انت...
    قبل 13 عامًا
  • يا بارى الكون - يا بارى الكون فى عز وتمكين وكل شى جرى بالكاف والنون يا من احس به فى كل كائنة وقد تعاليت عن ظن وتخمين فى هدئه الليل يارب اراك فى هدئة الليل يارب اراك ف...
    قبل 14 عامًا
  • - معكم يوميا راديو الحجار من الساعه التاسعه الي الساعه العاشره صباحا ومن الساعه الثانيه ظهرا الي الرابعه ظهرا ومن الساعه الواحده بعد منتصف الليل الي السا...
    قبل 16 عامًا
  • اطفال الجنه - ايها الحب المطل من شرايين النقاء ايها الخير العظيم يا ضياء من ضايء ايها الحب المطل من شرايين النقاء ايها الخير العظيم يا ضياء من ضايء جئت بالحق تنادى ر...
    قبل 16 عامًا
  • كتاب اسرار حيرت العلماء - *كتاب اسرار حيرت العلماء سلسله اغرب من الخيال حيرت العلماءحمل من هنا*
    قبل 16 عامًا

إجمالي مرات مشاهدة الصفحة