يابو الريش !
كلمات سيد حجاب
الحان ياسر عبد الرحمن
كلمات الاغنيه
يابو الريش ليه التهويش وانت لا عضلات ولا خرابيش
فين انت وفين كل كلامك بيصفصف كله على مفيش…
يابو الريش!
فى جنينة الحيوان فى الجيزة شفت حاجات مضحكة ولذيذة
شفت طاووس حلو مالوش ميزة غير ديله المنفوش والريش
كان فارد ديله بيتعاجب ويقولى بالعين والحاجب
أنا أعظم طائر والواجب تدينى أكبر بقشيش
فجأة النسر فتح منقاره وزعق كل العصافير طاروا
حتى صاحبنا لم صغاره وادَّارى قلت له بشويش. .
يابو الريش!
كان فيه نسناس في الجبلاية متعلق فوق الشجراية
وأنا جاى أحدف له تمراية قالى ابعد وما تحدفليش
دى الجبلاية دي بنسانيسها ملكى أنا وأنا اللى حارسها
حتى الغابة أنا كنت رئيسها وملكها انت ماتعرفنيش؟
فجأة الدنيا الصافية اوحَشِّت ظهر الأسد النسانيس كشت
وادَّارت فى الأش وخَشِّت وصاحبنا اتخشب ما جريش…
يابو الريش!
لما قططنا عن البيت غابوا وقف الفار يضحك لاصحابه
ويقول ويبرم فى شنابه ويقرقض فى صابون وف عيش
مين قدى هنا أنا مين قدى مين له قوة نابى ويدى
ده القط ده يوم شافنى معدى بيهرب وكأنه ماشافنيش
فجأة الباب زيَّأ والقطة خشت نط الفار النطة
وادارى ف جحره واتغطى سمع الهوا بيقول م الشيش
